पालिका प्रमुख हरिशचन्द्र रानाको अथक प्रयास र निरन्तर पहलपछि बेलडाँडीमा पहिलोपटक सडकमा परेका जोखिमयुक्त रुख हटाउन आदेश जारी भए संगै आज शुक्रवार देखि काटिन थालेका छन् । वर्षौंदेखि बन र निकुञ्जका कानुनिक अवरोधका कारण हटाउन नसकिएका यी रुख पालिका प्रमुखको सक्रियतामा अन्ततः कटानीको प्रक्रियामा पुगेका हुन् ।
बेलडाँडी स्थित चवन्नी बजारदेखि बेलडाँडी बजारसम्मको सडक खण्डमा रहेका रुखहरु हावाहुरी वा वर्षात्को बेला यात्रु र सवारी साधनका लागि खतरा बनेका थिए । पालिकाले पटक–पटक विभागमार्फत सम्बन्धित निकायलाई कटानीका लागि सिफारिस गर्दै आएको थियो ।
पालिका प्रमुख रानाले निरन्तर ताकेता गर्दै वन नियमावली २०७९ को नियम ३६ बमोजिम “उपयुक्त देखिएको” र नियम ३७(१) अनुसार अनुमति प्राप्त गराई, अनुगमन तथा मूल्यांकन समितिबाट स्थलगत निरीक्षण गराई कार्य अगाडि बढाएका हुन् । अब यी रुख कटानी गरी बेलडाँडी इलाका प्रहरी वा बेलडाँडी रेञ्जर पोष्टको जिम्मामा राखिने भएको छ ।
यो निर्णयले सडक सुरक्षामा ठूलो सहजता ल्याउने जनविश्वास बढ्दो छ । स्थानीयवासी युवा व्यापारी प्रकाश मालीका अनुसार्, “यो त हामीहरुका लागि राहत हो, अब सडकमा हिंड्दा वा गाडीमा यात्रा गर्दा डर गर्नु पर्ने छैन । प्रमुखज्यूलाई धन्यवाद छ ।”
यस कदमलाई स्थानीयबासीले पालिका प्रमुख रानाको जनहितमा गरिएको अथक प्रयासको जितका रूपमा लिएका छन् । अब बेलडाँडीमा यात्रु, विद्यार्थी, व्यापारी र सर्वसाधारण सबैको यात्रा अझ सुरक्षित र सहज बन्ने भएको छ ।