सुनिल राना
भिनपा–१९ बागफाँटामा अवस्थित शिवशक्ति महिला विकास समिति समूहले आफ्नो ६ औं वार्षिक साधारण सभा आज मिति २०८२ भदौ ७ गते शनिबार सम्पन्न गरेको छ। कार्यक्रम समिति अध्यक्ष राजवति रानाको अध्यक्षतामा सम्पन्न भएको हो।
कार्यक्रमका प्रमुख अतिथि भिनपा–१९ बागफाँटाका वडा सदस्य डम्मर बहादुर जोरा रहनुभएको थियो। साथै स्थानीय समाजसेवी, बुद्धिजीवी, महिला प्रतिनिधि तथा बचतकर्ताहरूको उल्लेख्य उपस्थिति रहेको थियो।
सभालाई सम्बोधन गर्दै अध्यक्ष रानाले महिलाको सशक्तीकरण, आत्मनिर्भरता र क्षमता विकास समितिको मूल लक्ष्य भएको र यस उद्देश्यप्रति निरन्तर प्रतिवद्ध रहँदै आएको बताउनुभयो। उहाँले विगतका गतिविधिहरूले महिलामा आत्मविश्वास अभिवृद्धि गरेको उल्लेख गर्दै आगामी दिनमा अझ प्रभावकारी कार्यक्रमहरू ल्याउने प्रतिबद्धता समेत व्यक्त गर्नुभयो।
त्यस्तै प्रमुख अतिथि जोराले वडा कार्यालय महिला विकास, सीपमूलक तालिम तथा समाज सुधारका कार्यक्रमप्रति सँधै सहयोगी रहने प्रतिबद्धता व्यक्त गर्नुभयो। संस्थाले महिलालाई सक्षम बनाउन महत्वपूर्ण योगदान पुर्याइरहेकोमा खुसी व्यक्त गर्नुभयो।
कार्यक्रममा बचतकर्ताहरूले आफ्नो साँस्कृतिक पहिचान झल्काउने राना परम्परागत पोशाकमा आकर्षक उपस्थिति जनाएका थिए। यसले सभालाई अझै भव्य र उत्साहपूर्ण बनाएको सहभागीहरूले बताएका छन्।
समितिले स्थापना देखिनै स्थानीय महिलाहरूलाई बचत–ऋण, आयआर्जन कार्यक्रम, सीप विकास तालिम तथा सामाजिक जागरण गतिविधिमा संलग्न गराउँदै आएको छ।