काठमाडौं । एडी एनकेटियाको ह्याट्रिकप्रेरित आर्सनलले मंगलबार राति लिग कपमा लिग वानको क्लबको क्लब सन्डरल्यान्डलाई ५–१ ले हराउँदै सेमिफाइनलमा स्थान पक्का गरेको छ । एनकेटियाले १७औं मिनेटमा गरेको गोलबाट आर्सनलले अग्रता लिएको थियो । २७औं मिनेटमा निकोलस पेपेले अग्रता दोब्बर बनाए । ४९औं मिनेटमा व्यक्तिगत दोस्रो गोल गरेका एनकेटियाले ५८औं मिनेटमा ह्याट्रिक गरे । इन्जुरी समयमा १८ वर्षे चार्ली पाटिनोले अर्को गोल थपे । पाटिनोको यो डेब्यू खेल थियो ।

नाथन ब्रोडहेडले ३१औं मिनेटमा गरेको गोल सन्डरल्यान्डका लागि सान्त्वना बन्यो । आर्सनलले अब टोटनहम र वेष्ट ह्यामबीचको विजेतासँग फाइनल प्रवेशका लागि प्रतिस्पर्धा गर्नेछ । क्वार्टरफाइनलका अन्य खेलमा बुधबार राति लिभरपुलले लेस्टर सिटीसँग प्रतिस्पर्धा गर्नेछ भने चेल्सीले ब्रेन्टफोर्डविरुद्ध खेल्नेछ ।