काठमाडौं । काठमाडौं उपत्यकाको वायु प्रदूषण आज घातक अवस्थामा पुगेको छ। आईक्यू एअरका अनुसार आज काठमाडौंको वायु गुणस्तर ३५२ एक्यूआई पुगेको छ। विश्व स्वास्थ्य संगठन डब्लुएचओले निर्धारण गरेको मापदण्डअनुसार अनुसार ५१ देखि १०० सम्मको एक्यूआईलाई सामान्य मानिन्छ भने एक्यूआई २०१ भन्दा माथि पुगे धेरै अस्वस्थकर हुन्छ। डब्लूएचओका अनुसार ३०१ भन्दामाथि पुगे घातक हुन्छ।
यसअघि गएको सोमवारदेखि हिजोसम्म २५० को हाराहारीमा वायु गुणस्तर मापन हुँदै आएको थियो । यो समाचार तयार पार्दासम्म आज बिहान नेपालको काठमाडौं विश्वकै प्रदूषित सूचीको दोस्रो स्थानमा छ।
पहिलो नम्बरमा भने इराकको बग्दाद परेको छ। त्यहाँको वायु गुणस्तर १ हजार १०१ एक्यूआई पुगेको छ। विगत केही दिनदेखि वायु प्रदूषणका कारण काठमाडौं उपत्यकामा डम्म लागेको बादल फाट्न अझ केही दिन लाग्ने भएको छ। यद्यपि शुक्रबारदेखि भने वायुको वेग आजको तुलनामा अधिक हुने सम्भावना रहेकाले क्रमशः सुधार भई आकाश खुल्ने जल तथा मौसम विज्ञान विभागको मौसम पुर्वानुमान महाशाखाले जनाएको छ।
हाल काठमाडौं उपत्यकामा वर्षा हुने अवस्था नरहेको तर वायुको वेग बढ्ने हुँदा क्रमशः आकाशबाट बादल हट्ने लक्षण देखिएको मौसमविद् बिनु महर्जनले जानकारी दिइन्। बुधबारकोे तुलनामा तापक्रम पनि केही घटे पनि शुक्रबारदेखि बढ्ने उनले बताइन्।