कञ्चनपुर । कञ्चनपुरको सिद्धनाथ विज्ञान क्याम्पसले आगामी बर्ष स्वर्णजयन्ती बर्ष मनाउने भएको छ । भीमदत्त नगरपालिका १८महेन्द्रनगरमा रहेको त्रिभुवन विश्वविद्यालयको आंगिक सिद्धनाथ विज्ञान क्याम्पसले १२असार ०८३मा स्वर्णजयन्ती बर्ष मनाउने भएको हो ।
सिद्धनाथ विज्ञान क्याम्पस प्रमुख डा. तिलमाया ढकालले क्याम्पस स्थापना भएको अवसरमा विवित शैक्षिक कार्यक्रम गरेर स्वर्णजयन्ती बर्ष मनाउने बताईन । ५० बर्ष अघि १२ असार ०३३ साल महेन्द्रनगरमा विज्ञान क्याम्पस स्थापना भएको अवसरमा आउँदो बर्ष विवित कार्यक्रम गरेर दिवस मनाउने भएको छ ।
क्याम्पस प्रमुख ढकालले स्वर्ण जयन्तीकोे अवसरमा पुर्व विद्यार्थीको विवरण तयार गर्ने, बर्षिक मुखपत्र अङकुरको स्वर्णजयन्ती विशेषाङक प्रकाशन, रक्तदान, क्याम्पसका संस्थापक सदस्य, विशेष सहयोगी तथा राष्ट्रलाई विशिष्ठ योगदान दिने पुर्व विद्यार्थी, प्राज्ञिक तथा समाजिक क्षेत्रमा व्यक्तिलाई सम्मान गर्ने कार्यक्रम गर्ने जनाएको छ ।
तत्कालीन सुदूरपश्चिमाञ्चल विकास क्षेत्रमा विज्ञान विषयको उच्चशिक्षा पठनपाठन हुने एकमात्र शैक्षिक संस्थाको रूपमा स्थापना भएको यस क्याम्पसमा अध्ययन गरेका हजारौं विद्यार्थीहरू हाल देशविदेशमा वैज्ञानिक, अनुसन्धाता, प्राध्यापक, शिक्षक, डक्टर, इन्जिनियर, राजनीतिज्ञ, राष्ट्रसेवक–कर्मचारी, पत्रकार, सामाजिक अभियन्ता लगायतका विविध क्षेत्र र पेशाको विशिष्ट तहमा कार्यरत छन् ।