खडक रावल
कञ्चनपुरको दोधाराचाँदनी नगरपालिकामा दोधाराचाादनीमा लालपुर्जा वितरणको तयारी अघि बढाएको छ । भुमि समस्या समाधान आयोग प्राविधिक टोलीले बिहीबार दोधारा चाँदनी नगरपालिका पुगेर भुमिसम्बन्धी प्राविधिक कार्यको निरीक्षण गरेको छ।
नापी निमित्त प्रमुख दिजै राज भट्टले तीन वर्षे कार्यविधि अन्तर्गत सबै लाभग्राहीलाई रातो पुर्जा वितरण गर्ने लक्ष्य लिएको छ। “जनशक्ति बढाएर भए पनि कामलाई समयमै सम्पन्न गरिन्छ,“ उहाले बताउनु भयो ।
भुमि समस्या समाधान आयोग कंचनपुरका अध्यक्ष नेत्र प्रकाश पन्तले कञ्चनपुरका ९ वटै पालिकामा हाल आयोगको टोलीले काम गरिरहेको जानकारी दिए। “हाम्रो लक्ष्य यही दशैं अघि १,००० पुर्जा वितरण गर्ने रहेको छ,“ उनले भने। कञ्चनपुर जिल्लामा हालसम्म ७२,९३० निवेदन प्राप्त भइसकेको जानकारी दिँदै उनले वार्षिक रूपमा करिब १५ देखि २० हजार पुर्जा वितरण गर्ने योजना रहेको पनि बताए।आयोगका विज्ञ सदस्य दिल बहादुर सीजालीले अघिल्ला आयोगले सुरु गरेर अधुरा छाडिएका कामलाई सम्पन्न गर्न टोली दोधारा चाँदनी आएको उल्लेख गरे।
उनका अनुसार वडा नं. १, २, ३, ५, ८, र ९ मा नापजाँच सकिएको छ भने वडा नं. ४, ६, ७ र १० मा चाँडै काम सुरु गरिनेछ।सीजालीका अनुसार वडा नं. ३ बाट २३ वटा र वडा नं. ५ बाट ४८ वटा फाइल तयार भइसकेको छ।
यस्तै, हालै वडा नं. ८ मा ३२२ वटा र वडा नं. ९ मा ४२ वटा फाइलको चेकजाँच गरिएको हो। दशैंपछि बाँकी रहेका वडाहरूमा पनि नापजाँच तथा पुर्जा वितरणको काम तीव्र पारिने उनले जानकारी दिए। दोधारा चाँदनी नगरपालिकाका नगर प्रमुख किशोर कुमार लिम्बुले सार्वजनिक जग्गा विशेषगरी खोला नालाको किनारमा अतिक्रमण गर्नेहरूप्रति आयोगले गम्भीर ध्यान दिनुपर्ने बताएका छन्।
उनले भने, “गहिरो अध्ययनसहित विवादरहित तरिकाले नापजाँच गर्नु आवश्यक छ। हाम्रो कार्यकालमै पुर्जा वितरण सम्पन्न गर्न सके झनै राम्रो हुने बताए । टोलीमा भुमि समस्या समाधान आयोग कंचनपुरका अध्यक्ष नेत्र प्रकाश पन्त, कञ्चनपुर नापी कार्यालयका निमित्त प्रमुख दिजै राज भट्ट, तथा आयोगका विज्ञ सदस्य दिल बहादुर सीजाली सहभागी थिए। निरीक्षणका क्रममा हालसम्म सम्पन्न कार्यको मूल्याङ्कन तथा आगामी योजना सम्बन्धी छलफल गरिएको थियो।