भोजराज जोशी,
कञ्चनपुर शुक्लाफाँटा नगरपालिका–११ स्थित श्रीकृष्ण सामुदायिक वन उपभोक्ता समूहले फोहोर व्यवस्थापन केन्द्रमा तालाबन्दी गरेको छ। बिहीबार फोहोर व्यवस्थापन केन्द्रको गेटमा तालाबन्दी गरिएको हो।
शुक्लाफाँटा नगरपालिकाले विगतमा गरेका प्रतिबद्धता पूरा नगरेपछि फोहोर व्यवस्थापन केन्द्रको गेटमा तालाबन्दी गरिएको सामुदायिक वनका अध्यक्ष अमरबहादुर ऐरले बताए।उनका अनुसार नगरपालिका र सामुदायिक वन उपभोक्ता समुहबीच ११ बुँदे सम्झौता भएको थियो।उनले सम्झौता भएको ३ वर्ष बितिसक्दा पनि नगरपालिकाले कुनै माग पूरा नगरेको बताए ।
शुक्लाफाँटा नगरपालिकाभित्र बाहेकको फोहर भित्र्याउन नपाउने, बस्तीसँग जोडिएको वनमा मेसवायर जडान गर्ने, प्रत्येक उपभोक्ताको घरमा एलपी ग्यास उपलब्ध गराउने, वनको पूर्वमा बनहरा र पश्चिम सुनवरा नदीमा तटबन्ध गर्ने, स्थानीयलाई रोजगारी दिनेलगायतका विषय सम्झौता भएको उनको भनाई छ।त्यस्तै, प्रभावित क्षेत्रका सडकमा सडक बत्ती जडान गर्ने, सिमसार क्षेत्रलाई वैज्ञानिक व्यवस्थापनका साथ संरक्षण गर्ने, प्रत्येक उपभोक्ताको स्वास्थ्य बिमा गर्नेलगायतका विषयमा नगरपालिका र सामुदायिक वनबीच सहमति भएको थियो। वनका उपभोक्ताहरुले सम्झौता कार्यान्वयन नभए वडा र नगरपालिकामा पनि तालाबन्दी गर्ने चेतावनी दिएका छन्। नगरपालिकाले विगतमा भएका सम्झौता कार्यान्वयन नगरेसम्म तालाबन्दी जारी राख्ने सामुदायिक वनका उपभोक्ताले बताएका छन्।