कैलालीको एक ब्रोइलर कुखुरा फर्ममा आगलागी भएको छ। जिल्लाको गौरीगंगा नगरपालिका वडा नम्बर १ चनौराको डिपलव कृषि पोल्टी फर्ममा आगो लागेको प्रहरीले जनाएको हो। इलाका प्रहरी कार्यालय चौमालाका अनुसार मंगलबार बिहान ८ बजे विद्युत सर्ट भएर फर्ममा आगलागी भएको हो।

२ सय साना ब्रोइलरका चल्ला र २० बोरा दानासहित ६८ फिटको फर्म जलेर नष्ट भएको प्रहरीले बताएको छ। शिव भुलले सञ्चालन गरेको उक्त फर्ममा लागेको आगोका कारण झण्डै १० लाखको क्षति भएको छ। फर्मका सञ्चालक शिव भुलले फर्मको बीमा भने गर्न नसकिएको बताए।