कञ्चनपुर, असार, प्रधानमन्त्री पुष्पकमल दाहाल प्रचण्डले ठुल ठुला भ्रष्टाचारकाण्डका फाइल केही दिनमै खोलिने बताएका छन । माओवादी केन्द्रको युवा संगठन वाइसिएलको केन्द्रीय कार्यालयका नेता र इन्चार्जसँग सोमबार प्रचण्डले भ्रष्टाचारका अन्य फाइल पनि खोलिने बताएका हुन । माओवादी केन्द्रका अध्यक्ष समेत रहेका प्रधानमन्त्री प्रचण्डले देशमा भ्रष्टाचार निवारण र सुशासनको पक्षमा कोही कसैसँग पनि सम्झौता नगर्ने समेत बताए ।
प्रधानमन्त्री प्रचण्डले विगतका सबै काण्डको छानबिन गरी दोषीलाई कानुनी दायरामा ल्याउने बताउँदै सुशासनका पक्षमा नयाँ ढंगबाट अघि बढेको बताएका छन । ‘प्रतिगामी र पुनरुत्थानवादीविरुद्ध अहिलेको सत्तारूढ गठबन्धन बनेको हो । सुशासन र समृद्धिको यात्रामा सरकार अगाडि बढेको छ । सरकार रहला नरहला चिन्ता छैन । यो त कास्टिङ मात्रै हो । भ्रष्टाचारका अरू फाइल पनि खुल्दै छन,’ प्रधानमन्त्री प्रचण्डको भनाइ उद्धृत गर्दै वाइसिएल अध्यक्ष सुबोध शेर्पालीले भने, ‘सुशासन र समृद्धिको यात्रामा युवाप्रति आफूले भरोसा गरेको प्रचण्डले बताएका छन ।
अहिलेको गतिले नपुग्ने भन्दै उनले वाइसिएललाई युवा जोस र जाँगरका साथ अघि बढ्न निर्देशन दिएका छन । सरकारको राम्रो कामको प्रचारमा लाग्न पनि उनले आग्रह गरे । माओवादीको युवा संगठन वाइसिएलको केन्द्रीय कार्यालयका नेता र इन्चार्जसँग प्रचण्ड करिब २ घन्टा खुलेर प्रस्तुत भएका थिए । उनले सरकारको काम, पार्टी निर्माण र युवाको भूमिकाबारे विस्तृत रूपमा बताएका थिए ।
वाइसिएल इन्चार्ज रामप्रसाद सापकोटाका अनुसार प्रचण्डले पार्टी एजेन्डाको रक्षा गर्नका लागि आफूले यसपटक प्रधानमन्त्रीमा जोड गरेको बताए । ‘पार्टी विभाजन हुँदा हाम्रो एजेन्डामा अरूले अपनत्व लिए । भ्रष्टाचारी नै भ्रष्टाचारविरोधीजस्ता देखिन खोजे ।
नयाँ भनिएकाको पनि अवस्था देखियो । हामी नयाँ ढंगले अगाडि बढ्नुको विकल्प छैन । जनताको अवस्था बदल्न, भ्रष्टाचार निवारण गर्न र सुशासन कायम गर्न सरकारले अहिले क्रान्ति नै सुरु गरेको हो । हामी हाम्रा एजेन्डा स्थापित गरिछाड्छौँ ।’ प्रचण्डको भनाइ उद्धृत गर्दै सापकोटाले भने ‘देश र जनताको पक्षमा काम गर्दा संकटमा पुगे पनि ठीकै छ । राजनीतिक परिवर्तनलाई संस्थागत गर्न पनि जनताको अवस्था बदल्दैपर्छ ।’
सरकार स्पष्ट दृष्टिकोणका साथ प्रस्तुत भएको भन्दै प्रचण्डले भ्रष्टाचारलाई कुनै पनि रूपमा संरक्षण नगर्ने बताए । सापकोटाले सरकारले चालेका जनपक्षीय कदमलाई जनतासम्म र्पुयाउने गरी अगाडि बढ्ने बताए । ‘सरकारका जनपक्षीय कामको रक्षा, नयाँ विचार, नयाँ संस्कार र संस्कृतिका साथ पार्टी निर्माण सम्भव छ भन्ने गहिरो अनुभूति भया,े’ सापकोटाले भने । जनतातिर फर्किने सरकार र पार्टीको रूपमा स्थापित गर्ने उनले बताए । उनले माओवादी पृष्ठभूमिका शक्तिहरूसँग एकता र अन्य वामसमाजवादी शक्तिसँग कार्यगत एकताको नीति लिएको पनि बताए ।
प्रचण्डले आफ्नो पृष्ठभूमि बताउँदै युवा विचार, राजनीतिक र संगठनात्मक परिपक्व हुँदै नेतृत्वका लागि तयार हुनुपर्ने बताए । मोहनविक्रम सिंहबाट आफूले नेतृत्व लिएजसरी नै युवालाई नेतृत्व दिन तयार रहेको उनले बताए । ‘विचार, राजनीतिक र सांगठनिक रूपमा युवा तयार हुनुर्पयो । जसरी मैले युवा अवस्थामा नेतृत्व लिएँ, मलाई देखेर मोहन विक्रमसिंहले नेतृत्व हस्तान्तरण गर्नुभयो । त्यसैगरी म नेतृत्व युवालाई हस्तान्तरण गर्न तयार छु । तर, त्यसका लागि युवा तयार हुनुपर्छ,।’ प्रचण्डको भनाइ उद्धृत गर्दै सापकोटाले भने । ‘मैले कहिलेकाहीँ भन्ने गर्दछु, हाम्रोभन्दा राम्रो विचार लिएर आउने कोही छ भने, हाम्रोभन्दा धेरै त्याग तपस्या गरेका दलहरू कोही अघि आउने, हाम्रोभन्दा राम्रो एजेन्डासहित जनताको जीवनमा परिवर्तन ल्याउने विश्वासका साथ कोही आउने हो भने हामीलाई तिनीहरूलाई सम्मान गर्न, तिनीहरूको लागि ठाउँ छोड्दिन केही गाह्रो छैन,’ उनले भने, ‘तर म हजारौँपटक विचार गर्छु, त्यस्तो स्थिति छैन। हामीले अलिकति पनि हेलचेक्र्याइँ गर्ने हो भने यो सिस्टम मात्रै होइन, यो देशकै भविष्य अहिलेको विश्व राजनीतिक परिवेशलाई हेर्दा पोलराइजेसनको जो प्रक्रिया जुन दुनियाँमा चलिरहेको छ, त्यसलाई हेर्दा र त्यसभित्रै जस्ता प्रवृत्ति र अराजकता देखिँदै छ ।’ अहिले सरकारले सुशासनका क्षेत्रमा गरिरहेको कामदेखेर जनता समेत हर्षित भएका छन ।