कञ्चनपुर । कञ्चनपुरमा शुक्लाफाँटा पर्यटन महोत्सव शुरु भएको छ । कञ्चनपुरको पर्यापर्यटन प्रर्बद्धनका लागि शुक्रबारदेखि शुक्लाफाँटा पर्यटन महोत्सव शुरु भएको हो । भीमदत्त नगरपालिकाको आयोजनामा हुन लागृेको आठौँ शुक्लाफाँटा पर्यटन महोत्सवको सुदूरपश्चिम प्रदेश सभा सदस्य बेल बहादुर रानाले उद्घाटन गर्दै पर्यटनका माध्यामबाट आम्दानी बृद्धिका लागि महोत्सव सरानिय भएको बताए । उनले तीनै तहका सरकारको संयुक्त साझेदारीमा पर्यटकीय कामकाज अघि बढाउनुपर्ने जोडदिएका छन ।
भीमदत्त नगरका प्रमुख पदम बोगटीले निकुञ्ज जिल्लाका अन्य पालिकासंगै जोडिएको भएपनि भीमदत्त नगर जेठो पालिका भएकाले आफैले दायित्व लिएर कार्यक्रम संचालन गरेको बताए । मेयर बोगटीले पर्यटकीय सम्भावना बोकेको शुक्लाफाँटामा आन्तरिक तथा बाह्य पर्यटक भित्र्राउनुपर्नेमा जोडदिएका छन ।
भीमदत्त नगर पर्यटन विकास समितिका उपाध्यक्ष राजेन्द्र केसीले विगतका बर्षहरु जस्तै यस बर्षपनि नगरपालिकाले शुक्लाफाँटा पर्यटन महोत्सव मनाउन लागेको बताउँदै शुक्लाफाँटा राष्ट्रिय निकुञ्ज स्थापनाको अवसर पारेर कञ्चनपुरको पर्यापर्यटन प्रर्बद्धनका लागि सरोकारवालासंग समन्वय गरेर महोत्सव आयोजना गरिएको बताए । सात दिनसम्म मनाईने महोत्सवका हरेक दिन फरकफकर कार्यक्रम रहेका छन ।
पहिलो दिन सुदूरपश्चिमको लोक सस्कृति झल्किने गरेर झाँगी प्रर्दशन सहित उद्घाटन गरिएको छ । दोस्रो दिन निकुञ्जभित्र भारतीय पत्रकार सहितका सरोकारवालाहरुलाई भ्रमण, तेस्रो दिन एयरपोर्टदेखि निकुञ्जसम्म सरसफाई, चौथो दिन डिजिटल मार्फत निकुञ्जको प्रचारप्रसार, पाचौँ दिन निकुञ्ज सम्बन्धी निबन्ध प्रतियोगिता, छैटौँ दिन पर्यटन बारे सरोकारवालासंग छलफल र सातौँ दिन निकुञ्जका कर्मचारी र भीमदत्त नगरका जनप्रतिनिधीविच मैत्रीपुर्ण फुटबल प्रतियोगिता राखेर समापन गरिनेछ ।
‘१२फागुनदेखि महेन्द्रनगर खुला मञ्चमा हुने महोत्सवमा आउने राष्ट्रिय कालाबारहरुलाई निकुञ्ज अवलोकन गराईनेछ, ‘उपाध्यक्ष केसीले भने, ‘यसरी राष्ट्रिय कलाकार निकुञ्ज अवलोकन गराएपछि उहाँहरुबाट समेत थप प्रचारप्रसार हुनेछ ।’
भीमदत्त नगरका नगर प्रवक्ता पदमराज अवस्थीले पर्यटकीय सम्भावना बोकेका निकुञ्जमा पर्यटनको संख्या बृद्धि गर्दै यहाँको आर्थिक बृद्धि विकासका लागि महोत्सव आयोजना गरिएको बताए । प्रवक्ता अवस्थीले कञ्चनपुरकै हितका लागि महोत्सव आयोजना गरिएको बताए । महोत्सवलाई थप स्तरिय बनाउन र पर्यटकीय गन्तव्य बनाउन नागरिक स्तरबाटै सुझाव आएको छ ।