डोटी २५, कार्तिक । डोटीमा मोटरसाइकलको ठक्करबाट एक महिलाको मृत्यु भएको छ। इलाका प्रहरी कार्यालय दिपायलका प्रमुख धर्मानन्द जोशीका अनुसार मृत्यु हुनेमा दिपायल सिलगढी नगरपालिका -४, पिपल्लाकी ७० वर्षीया टिकेश्वरी विक रहेकी छन्।

पिपल्ला बजारमा हिँडिरहेको अवस्थामा से५प ९४६९ नम्बरको मोटरसाइकलले ठक्कर दिँदा गम्भीर घाइते भएकी उनलाई दिपायल पिपल्लामा रहेको शैलेश्वरी अस्पतालमा उपचार गर्ने क्रममा आज मृत्यु भएको प्रहरी पोष्ट पिपल्ला बजारका प्रमुख तथा प्रहरी सहायक निरीक्षक खेमराज भट्टले जानकारी दिए।

ठक्कर दिने मोटरसाइकल घटनास्थलमै छाडी चालक भागेकाले मोटरसाइकल प्रहरीले नियन्त्रणमा लिएको छ। फरार चालकको खोजी भइरहेको प्रहरीले जनाएको छ। रासस