बैतडीमा किशोरी बलात्कारको प्रकरणमा वडा अध्यक्ष सहित ४ जना पक्राउ परेका छन। जिल्लाको सिगास गाउँपालिका –३ का वडा अध्यक्ष शेरसिंह साउँद सहित थप ४ जनालाइ पक्राउ गरीएको बैतडी प्रहरीले जनाएको हो। सिगास गाउँपालिकाकी एक किशोरीलाई बलात्कार प्रकरणमा वडा अध्यक्ष सहित सोही ठाउँका राजेन्द्र धामी, नरेन्द्र धामी र गोपाल धामीलाई पक्राउ गरिएको जिल्ला प्रहरी कार्यालयका प्रमुख प्रहरी नायव उपरीक्षक नारायणप्रसाद अधिकारीले जानकारी दिए।
यसअघि सो घटनामा संलग्नताको आरोपमा प्रहरीले मनोजसिंह धामी र अमर धामीलाई नियन्त्रण लिएको थियो। उनीहरुमाथि अदालतबाट म्याद थपेर अनुसन्धान भईरहेको प्रहरी नायव उपरीक्षक अधिकारीले बताए। बलात्कार घटनाका मुख्य आरोपित सिगास ३ का दीपकसिंह धामी भने फरार रहेका प्रहरीले जनाएको छ। सिगास गाउँपालिका ३ की १८ बर्षीया किशोरीमाथि गत जेठमै बलात्कार भएको र गत असार १४ गते गाउँमै तमसुक बनाएर सो घटना मिलाउन खोजिएको थियो।
तमसुकमा पीडित पक्षलाई कार्तिक मसान्तभित्र एकतोला सुन दिने भनिएको थियो। पीडित पक्षलाई सुन नदिएपछि बलात्कारको घटना बाहिर आएको हो।