कैलाली, असोज २३ । कैलाली जिल्लामा क्रियाशिल विभिन्न राजनैतिक दल निकटका विद्यार्थी संगठनहरुले कोभिड–१९ (कोरोना( भाइरससंगै जिल्ला भित्र देखिएका विभिन्न समस्याहरुको समाधानका लागि संयूक्त रुपमा ज्ञापनपत्र बुझाएका छन ।
नेपाल विद्यार्थी संघ, अनेरास्ववियू, अखिल (क्रान्तिकारी), अखिल (छैठौं), समाजवादी विद्यार्थी यूनियन लगायतले शुक्रबार शिक्षण सुधारको माग राख्दै कैलाली प्रमुख जिल्ला अधिकारी यज्ञराज बोहरालाई ज्ञापनपत्र बुझाएका हुन ।
उनीहरुले नीजि तथा सरकारी विद्यालयहरुले कोरोना आक्रान्तमा पनि आवश्यक स्वास्थ्य सामाग्री अवलम्बन नगरी विद्यालय सञ्चालनमा ल्याइएको जनाएको छ ।
विद्यार्थी संगठनहरुले स्वास्थ्य सर्तकता अपनाएर मात्रै शिक्षण संस्थाहरुमा पठनपाठनको वातावरण तयार गर्न माग गरेका छन ।
यस्तै, कोरोना कहरका बेला नीजि शैक्षिक संस्थाहरुले अनलाई क्लासका नाममा असुल्दै आएको शूल्कलाई नियन्त्रण गर्नुपर्ने, कोभिडका कारणले अल्पत्र परेका गरिव विद्यार्थी र मजदुरहरुलाई जिविकोपार्जन र कोठा भाडाको सन्दर्भमा तत्काल राहत प्याकेज घोषणा गर्नुपर्ने, यातायातमा बढाइएको ५० प्रतिशत भाडा वृद्धिदर खारेज गरी विद्यार्थीलाई दिइदै आएको सहुलियत कार्यान्वयन गर्न माग गरेका छन ।
विद्यार्थी संगठनहरुले नीजि विद्यालयहरुले विक्री वितरणको नाममा पब्लिकेशन संग मिलि मनोमानी ढंगले वर्षैपिच्छे पुस्तक वितरण गर्ने गरेको प्रवृतिलाई रोक्नुपर्ने र व्यापारीकरण, कालोवजारी, विकृतिलाई तत्काल नियन्त्रण गरी कारबाही गर्नुपर्ने माग गरेका छन ।तत्काल विद्यार्थीहरुका माग सम्बोधन नगरिए आन्दोलनका कार्यक्रम घोषणा चेतावनी समेत दिएका छन ।
