कञ्चनपुर ३, कार्तिक–विगतका दसैँमा टीकापुर नगरपालिका–४ बाघ माराकी खेमा शर्माको घर घटनास्थापनाअघि लिपपोत गरेर चिटिक्क हुन्थ्यो। यस वर्ष कोरोना महामारीको त्रासले उहाँलाई दसैँ मनाउन मन लागिरहेको छैन।‘‘समय सबैभन्दा बलवान छ। हामीले समय र परिस्थितिलाई पछ्याउँदै हिँड्नुपर्छ’’, शर्माले भने, ‘‘यो बेला कोरोना भाइरस सङ्क्रमणले सबैतिर आक्रान्त पारेको छ। कोरोनाको प्रभाव र सरकारको आग्रहअनुसार सुरक्षित भएर बस्नुपर्ने भएकोले आँगनमा आएको दसैँ पनि मनाउन मन लागेन।’’ शर्माले यस वर्ष घरमै सामान्य पूजाआजा र टिकोटाला गर्नुहुनेछ।
‘‘अघिल्ला वर्षजस्तो खसी ढाल्ने, माइती जाने, आफन्तकहाँ जाने र आउने काम बन्द हुनेछ’’, उहाँ भन्नुहुन्छ, ‘‘यस वर्ष बाँचे पो अर्को वर्ष मनाउला भनेर केही गरेनौँ।’’ शर्माको घरमा जस्तै यस वर्षको दसैँमा गाउँघरमा विगतका वर्षजस्तो चहलपहल देखिँदैन।
विगतका वर्षमा हप्ता दिन पहिले घर लिपपोत गर्ने, सरसामान मिलाउने, गाउँमा नाचगान गर्ने गरिन्थ्यो तर यस वर्ष त्यस्तो भएको खासै नदेखिएको टीकापुर–१ विपतपुरका वीरबहादुर मगर बताउँछन्। ‘‘दसैँ भनेपछि गाउँ नै रमाइलो हुन्थ्यो, बाहिर भएका सबै घर फर्कन्थे’’, मगरले भने, ‘‘यस वर्ष त दसैँ अगावै खर्च सकिएर लकडाउनमा घर फर्केका नेपाली भारत पसेका छन्, आर्थिक समस्या टार्न नसकेर कामको खोजीमा भारत पसेका हुन्।’’
पहिले भारत वा देश बाहिर रहेका, विभिन्न कारणले घर बाहिर भएकाहरू दसैँ मनाउन गाउँघर फर्कनेको लर्को लाग्थ्यो। ‘‘दसैँमा गाउँमा उमङ्ग हुन्थ्यो तर यस वर्ष खासै उत्साह नभएको भजनी नगरपालिका राजबाराकी आरती विकले बताए। ‘‘गाउँमा सबै त्रसित छन्, मानिसले बोलचाल बन्द गर्न थालिसके’’, विकले भन्नुभयो, ‘‘म पनि यस वर्ष माइत नजाने भएको छु।’’ प्रायः दसैँको समयमा थारु गाउँमा निकै चहलपहल हुन्थ्यो। आजभोलि थारु गाउँमा पनि चहलपहल र रमाइलो छैन।
विगत वर्षमा यो समयमा फरक–फरक टोल र थारु गाउँका नाटक, थारु नाच हुने गरेको देखिन्थ्यो तर यस वर्ष त्यस्तो उल्लास छैन’’, टीकापुरकै राजाराम चौधरी भन्नुहुन्छ, ‘‘थारु समुदायले एक महिनासम्म नाच्ने सखिया, बड्का, मुङग्रौहा, झुम्रा लगायतका नाच देख्न पाइएको छैन।’’ कोरोनाका कारण गाउँघर मात्र नभई सहर बजारमा पनि नागरिकको चहलपहल कम छ। बन्दाबन्दीले आर्थिक सङ्कट पनि सिर्जना गरेको छ।
टीकापुरकी कमला रावल मानिसको चहलपहल नहुनुमा र्आिर्थक कारण पनि रहेको बताउँछन्। ‘‘छ महिनादेखि सबै क्षेत्र बन्द रह्यो, मानिससँग अर्थ छैन’’, रावलले भने, ‘‘रकम भए पो किनमेल, चहलपहल हुन्छ।’’ टीकापुर अस्पतालका सिनियर नर्स कल्पना खड्काले स्वास्थ्य सबैभन्दा ठुलो भएकाले यस्तो बेलामा स्वास्थ्य सुरक्षामा ध्यान नदिई भिडभाड गरेर चाडपर्व नमनाउनु नै उचित भएको बताइन्। रासस
प्रतिक्रिया दिनुस