बैतडीका एक युवक २ दिनदेखि बेपत्ता भएका छन्। बेपत्ता हुनेमा जिल्लाको दशरथचन्द नगरपालिका १ गुरुखोला काण्डे गाउँका १५ बर्षीय विवेक भट्ट रहेका छन्। बुधबार अपरान्ह स्थानीय बजार मुस्याचौर जान्छु भनि हिडेका छोरा अहिलेसम्म बेपत्ता अवस्थामै रहेका विवेकका बुवा देवदत्त भट्टले बताए।
एकमात्र छोरा विवेक बेपत्ता भएपछि घरपरिवारका सदस्य चिन्तित बनेका उनले बताए। बेपत्ता रहेका विवेकले बिहीबार बिहान ९८६४७५६८५५ नम्बर बाट फोन गरेर आफु धनगढीमा रहेको बताएका थिए। गाडी लाइनमा जागिर लगाईदिने भन्दै विवेकले आफू लगायत अन्य ७÷८ जनालाई धनगढी लगिएको फोनमार्फत भनेको विवेकका बुवा देवदत्तले बताए।
विवेकले त्यती मात्रै भनेर फोन काटेकोले जागिर लगाईदिने मान्छे को रहेछ भन्ने खुल्न सकेको छैन्। विवेकले फोन गरेको मोबाईल अहिले स्वीच अफ गरिएको छ।
प्रहरी चौकीमा निवेदन
बेपत्ता छोरा खोजी गरिदिन देवदत्तले प्रहरी चौकी गुरुखोलामा निवेदन दिएका छन् । प्रहरीले किशोरको खोजी कार्य जारी रहेको बताएको छ। बेपत्ता किशोरको धनगढी लगाएका स्थानमा खोजी कार्या भइरहेको गुरुखोला प्रहरी चौकीका इञ्चार्ज, प्रहरी नायव निरीक्षक सुरेन्द्र देव भट्टले बताए।
गहुँगोरो वर्ण, ४ फिट उचाँई भएको , कपालमा रातो मेहन्दी,खैरो ज्याकेट,जिनको पाइन्ट र लेदरको जुत्ता लगाएको विवेकलाई फेला पार्ने व्यक्तिले नजिकको प्रहरी चौकी वा ९८६५८१३३६६ मा सम्कर्क गरिदिन अनुरोध गरिएको छ। बेपत्ता किशोर दशरथचन्द नगरपालिका १ गुरुखोलामा रहेको मणिलेक मावि गुुरुखोलामा कक्षा ९ मा अध्ययनरत रहेका थिए।